ԵՐԲ ՊԵՏՔ Է ՄԵԿ ՄԵԿՈՒ ՓՐԿԵԼ

ԹՐԹՌԱՑ ՍԻՐՏՆ ԻՄ

Թրթռաց սիրտն իմ միամիտ,

Երբ ելար ճամփին իմ նորից դու,

Հոգսաշատ աշխարհը իր բանին,
Չտեսավ հուզմունքը իմ ու քո:

Անշշուկ հպվեցի իմ սրտին`

 Կարոտս թողնելով անանուն,

Երազանք պահ տվի իմ մտքին,
Սիրտ իմ, քեզ աշխարհ եմ խոստանում:

Ինչ լեզվով ես հետդ խոսեմ,

Սիրտ իմ միամիտ,իմ խելառ,

Գարունը  քեզ շատ է հուզել,

Անունդ մտքում վաղուց կար:

Ընկել ես դու նրա խելքին,

Աշխարհի սիրուն` սիրավոր,

Երկնքիդ ճախրով իմ կրծքին`

Թռչուն ես ասես թևավոր:

Սիրտ իմ, խփվում ես պատեպատ,

Չի լինում  քեզ  արդեն   բռնել,

Հուզմունքիդ հեղեղը առատ

Հույզերիս ակունքն է գտել:

Լսիր ինձ, ամենա իմ  միակ,

Տես  ինչքան  ներքև եմ ընկել,

Գտել ես գժության ժամանակ,

Երբ  պետք է մեկ մեկու փրկել:

ԴՈՒ ԻՆՁ ՍԻՐԻՐ

Ես ինձ էլ չեմ սիրում,

Դու էլ ինձ մի սիրիր,

Կյանքի-մահվան  ծովում

Ջրահարս մի փնտրիր:

Ես ինձ էլ չեմ գտնում,

Ես մի կորչող փաթիլ,

Ծով կաթիլների մեջ`

Ես խենթացած կաթիլ,

Ես հույզերով իմ տաք

Ցավիդ մեջ եմ հառնում,

Դու ինձ սիրիր,սիրիր,

Ես ծաղիկ եմ դառնում:

ՄՈՌԱՑՎԱԾ ԾԱՂԻԿ ԵՄ ՀԻՄԱ

Մոռացված ծաղիկ եմ հիմա,
Ծաղկումի միամիտ թովչանքով,
Ինչ  ձեռք է, որ պիտի ինձ գա`
Աստըծո արարող խանդով:
Տարիքս մի արտ է հասուն,
Բարիքով, բուրմունքով բուրյան,
Զով հովից ծաղկի պես նազում`
Ծաղկի պես փխրուն եմ այնքան:
Մոռացված ծաղիկ եմ հիմա`
Իմ հող ու ջրի հավատով,
Ծաղկումս խնկում է` և նա
Կիրակի ունի լուսաշող:

ԵՍ ԷԼ ՔԵԶ ՆՄԱՆ ԾԱՂԿԻ ՍԻՐԱՀԱՐ

Ես էլ քեզ նման ծաղկի սիրահար,

Չիմացա ինչպես քնքշացավ սիրտս,

Կարմիր ծաղիկը կրակից էլ վառ`

Ցանկացա հպվել`բացելով  գիրկս:

Բայց չպոկեցի արմատից նրան,

Չուզեցի մահից տանջվի իմ միտքը,

Արբեցած բույրով նրա դյութական

Թողեցի սիրտս  այրի  տաք  կիրքը:

Ինձ այրող բոցից  որ չմոխրանամ,

Գնում եմ առանց հեքիաթ ու ծաղիկ,

Քնքշանքիս տեղը պիտի մոռանամ,

Երազանքիս դեռ կունենամ տալիք:

****