Քեզ կարոտում եմ`ուզես թե չուզես,

Գալիս եմ մոտդ  խոսքուզրույցի,

Ընկերոջ նման,ինչպես ինձ գիտես,

Բայց չեմ մոռանում լինել կանացի:

Քեզ համար չէ որ սիրունանում եմ,

Ինձ պետք չէ, որ դու ինձանով տարվես,

Քեզ մոտ ինքս ինձ հետ մտերմանում եմ,

Ու երկարում եմ ես քեզ մոտ էսպես:

Ու  չեմ վախենում ,թե բամբասեն էլ,

Երբ կրակ չկա, չկա նաև մուր,

Բառ ու բանի շուրջ տաք զրույցը մեր

Թե չգուշակեն` ափսոս,շատ են կույր:

Գրասեղանիդ մոտ լավ ես նայվում,

Գրքերիցդ ինձ նվեր ես տվել,

Հանգերով եմ քո ականջից կախվում,

Ուզում եմ տեսնես ես ինչ եմ գրել:

Այսպես,հիմա էլ մտքիս մեջ քեզ հետ`

Կարդում եմ հենց նոր գրած իմ երգը,

Թե չես հավանում`ջնջում եմ շատ հեշտ

Աչքիս առաջ է  քո թթու  դեմքը:

Մի խոսքով, արդեն քեզ կարոտել եմ,

Երկար ժամանակ որ չենք տեսնվել,

Կարոտիս երգն էլ անձայն  գրել եմ,

Մնում է լոկ քո ականջից կախվել…